Á aðalfundi ferðamálafélags V-Húnavatnssýslu í gær var opnuð ný og glæsileg heimasíða svæðisins. Á síðunni er að finna margvíslegar upplýsingar fyrir ferðamenn, um afþreyingu, áhugaverða staði, gistingu, veitingar o.m.fl. Á síðunni er einnig að finna fréttaveitu með upplýsingum um það helsta markvert á svæðinu auk atburða á döfinni. Einnig er umfjöllun um fyrirtæki mánaðarins úr hópi fyrirtækja á svæðinu.
Opið hús í Selasetrinu
Opið hús verður í Selasetrinu n.k. laugardag, 16. nóvember kl 12-16.
Við það tilefni efnum við til rýmingarsölu og bjóðum allar vörur með myndarlegum afslætti áður en við lokum búðinni fyrir veturinn. Gott tækifæri til að gera góð kaup og jafnvel versla nokkrar jólagjafir. Vörur frá Cintamani, gjafavara frá Bility, JG design, vandaðar Íslandsbækur og margt
fleira. Lítið við og gerið góð kaup.
Frítt inn í safnið eins og ávallt fyrir heimamenn. Einnig verðum við með veglegt kaffihlaðborð á kr 1500,- pr mann (750,- fyrir börn 6-12 ára).
Hlökkum til að sjá ykkur
Starfsfólk Selaseturs
Selatalningin mikla 2013
Niðurstöður úrSelatalningunni miklu 2013
Selatalningin mikla var haldin á vegum Selaseturs Íslands þann 21. júlí s.l. Talningin hefur farið fram árlega síðan árið 2007 og var þetta því sjötta talningin. Markmið talningarinnar er að fylgjast með fjölda og staðsetningu landsela í kringum Vatnsnes og Heggstaðanes, ásamt því að gefa almenningi tækifæri á að kynnast og taka þátt í rannsóknarstarfsemi Selaseturs Íslands.
Selir voru taldir á allri strandlengjunni á Vatnsnesi og Heggstaðanesi í Húnaþingi vestra, samtals um 100km. 30 manns tóku þátt í talningunni og fóru talningarmenn gangandi, ríðandi eða á báti. Talningin byggir algjörlega á þátttöku sjálfboðaliða, en með þessu móti gefst færi á að kanna stórt svæði á mjög stuttum tíma.
Í ár sáust samtals 757 selir á svæðinu (aðallega landselur). Það eru aðeins fleiri selir en sást 2012, en þá voru talin 614 dýr. Hinsvegar hefur fjöldin árin þar á undan verið yfir 1000 dýr. Mikilvægt er að hafa í huga að þessar talningar eru aðeins vísbending um lágmarksfjölda þeirra sela sem dvelja á þessu svæði. Margir þættir hafa áhrif á fjölda sela sem liggja uppi í látrunum og veður er einn þeirra.
Athuga ber að tölurnar segja ekki til um ástand landsselsstofns í heild. Stofnstærðarmat á landsel fór síðast fram 2011 og hefur farið fram reglulega síðan árið 1980 og þá hefur verið talið um land allt úr flugvél. Niðurstöður þeirra talniga benda til þess að landselstofninn hafi staðið í stað síðan árið 2003 og sé tæplega 12 þúsund dýr.
Umfjöllun um Selasetrið á sænskri bloggsíðu
Á dögunum sótti Lotte Lille Selasetrið heim og tók viðtal við sérfræðinga þess um starfsemi Setursins. Afraksturinn má finna á bloggsíðu Lotte Lille sem fjallar um seli á norðurslóðum
Smellið hér til að lesa umfjöllunina
Nýr framkvæmdastjóri
Unnur Valborg Hilmarsdóttir hefur tekið við starfi framkvæmdastjóra Selaseturs Íslands á Hvammstanga. Unnur hefur 20 ára reynslu af rekstri og stjórnun, sem aðstoðarframkvæmdastjóri Hreyfingar, framkvæmdastjóri Dale Carnegie á Íslandi, stofnandi og eigandi Vendum stjórnendaþjálfunar sem er leiðandi fyrirtæki á sviði markþjálfunar á Íslandi. Unnur hefur auk þessa komið að hinum ýmsu frumkvöðlaverkefnum. Unnur hefur BEd. próf frá KHÍ, Diploma í viðskipta- og rekstrarfræðum frá EHÍ auk þess að hafa hlotið víðtæka þjálfun í námskeiða- og fyrirlestrahaldi, lóðsun, þjálfun þjálfara og sölu- og sölustýringu. Unnur hefur lokið námi í stjórnendamarkþjálfun (e. Executive coaching) frá Coach University og Opna Háskólanum í Reykjavík og hefur ACC vottun frá ICF, International Coach Federation.