Selasetur Íslands

Hjá Selasetrinu er nú hægt að fóstra útselskópa. Selafóstranir hafa notið síaukinna vinsælda undanfarin ár enda eru þær tilvalin jólagjöf fyrir þá sem “eiga allt”. Með því að taka sel í fóstur er stutt við rannsóknarstarf Selasetursins en allur ágóði rennur beint til rannsókna.

Smelltu hér til að sjá nánari upplýsingar um fóstrun á sel.

 

Í sumar var tekin í notkun á Selasetrinu rafræn gestabók. Bjóðum við gestum okkar að skrá sig í gestabókina og mánaðarlega er dregið úr nafn heppins gests sem hlýtur að launum stuttermabol frá Selasetrinu.

Vinningshafar sumarsins og fram á haust eru eftirtaldir:

Júlí – Verbena Huber

Ágúst – Eric Vandenbosch

September – Yves Jacobs

Október – Bergsteinn Örn Ólafsson

Við biðjum vinningshafa um að senda okkur línu á netfangið info@selasetur.is með upplýsingum um stærð bols sem óskað er eftir ásamt heimilisfangi.

Við gerum hlé á happadrættinu á tímabilinu frá því í nóvember þar til í mars. 

 

Selasetur Íslands hlaut á dögunum styrk úr Vaxtarsamningi Norðurlands vestra vegna verkefnisins Áframhaldandi sókn náttúrutengdrar ferðaþjónustu í Húnaþingi vestra. Verkefnið nær til hugmynda og hönnunarvinnu á stækkun og endurbótum á sýningu Selaseturs sem og hugmynda og hönnunarvinnu á útisvæði við Selasetrið sem og hafnarsvæðinu öllu en hafnarsvæðið á Hvammstanga hefur mikið aðdráttarafl fyrir ferðamenn. Markmiðið með verkefninu er að fá þá ferðamenn sem til Hvammstanga koma til að staldra lengur við í sveitarfélaginu.

Styrkurinn hljóðar upp á 6 milljónir en heildar kostnaður við verkefnið er rúmar 13 milljónir.

Samstarfsaðilar Selaseturs í verkefninu eru fjölmargir: sveitarfélagið Húnaþing vestra, Kaupfélag V-Hún, Ferðamálafélag V-Hún, Gauksmýri ehf, Byggðasafn Húnvetninga og Strandamanna, Bóka- og skjalasafn V-Hún, Grunnskóli Húnaþings vestra, Ferðamáladeld Háskólans á Hólum, Kidka, Selasigling og Veiðimálastofnun.

Áætlað er að vinna við verkefnið hefjist í lok nóvember og því ljúki um mitt ár 2015. Verkefnisstjóri er Unnur Valborg Hilmarsdóttir, framkvæmdastjóri Selasetursins.

 

Fyrr á þessu ári hlaut Selasetrið ásamt Háskólanum í Stokkhólmi styrk frá Norrænu samstarfsnefndinni um félagsvísindarannsóknir (NOS-H) til að kanna þróun vistfræði og hegðunar ólíkra selategunda í samhengi við hegðun manna og umhverfisbreytingar. Þrír sérfræðingar á vegum Selasetursins, þau Sandra Granquist, Leah Burns og Erlingur Hauksson eru í Svíþjóð þessa dagana til að taka þátt í fyrri vinnustofunni af tveimur um samskipti manna og sela. Sandra og Erlingur halda kynningu um vistfræði og hegðun núlifandi selastofna og Leah heldur kynningu á menningarlegu mikilvægi sels í Norður Evrópu.

Seinni vinnustofan verður haldin á Íslandi síðari hluta árs 2015.

 

Selasetrið á fulltrúa á Þjóðarspeglinum, árlegri ráðstefnu í félagsvísindum í Háskóla Íslands þann 31. október 2014

Georgette Leah Burns deildarstjóri ferðamálarannsóknasviðs heldur erindi um stjórnun ferðaþjónustu í tengslum við villt dýr og hvernig hægt er að hafa áhrif á þróun slíkrar ferðaþjónustu með þeim hætti að ferðamenn fái að upplifa villt dýralíf á sama tíma og áhrif ferðmennsku á líf dýranna er lágmarkað. Hún segir m.a. frá viðmiðum sem notuð hafa verið við stjórnun slíkrar ferðamennsku í heimalandi hennar, Ástralíu, og hvernig hægt er að nýta sambærileg viðmið við íslenskar aðstæður.

Leah, Sarah Marschall meistaranem og Sandra M. Granquist deildarstjóri líffræðirannsóknasviðs Selasetursins kynna eiga einnig veggspjald á ráðstefnunni. Á því er einnig fjallað einnig tengsl villtra dýra og ferðamennsku. Greint er frá mismunandi leiðum til að fræða ferðamenn um umgengni við dýralífið og áhrif þessarar miðlunar á hegðun ferðamanna.