Mánudaginn 27. júlí fór Selatalningin mikla fram í 16. skipti. Alls tóku 43 manns þátt í talningunni sem hófst kl. 11:35 með fyrirlestri Dr. Söndru Granquist yfirmanns selarannsókna hjá Hafró og Selasetrinu. Dagskránni lauk svo með kaffiveitingum og spjalli með sjálfboðaliðum sem stóð til kl. 18. Sem fyrr var strandlengjan frá Reykjaskóla og inn Sigríðarstaðavatn, samtals rúmlega 100 km. gengin og tók talningin sjálf tæplega fimm klukkustundir.
Í fyrra voru taldir 445 selir sem var um 19% fækkun frá árum tveimur á undan þar sem taldir voru um 550 selir. Við bundum því vonir við að talningin 2025 hefði verið frávik eins og áður hefur gerst og fjöldinn færi aftur upp í ár. Því miður varð það ekki raunin þar sem fjöldinn stóð nánast í stað og 441 selir voru taldir. Vissulega var ansi hvasst á talningardegi sem gæti dregið úr fjöldanum en það verður að viðurkennast að niðurstaðan er áhyggjuefni. Til samanburðar voru taldir yfir 1.000 selir árin 2008-2010.
Á súluritinu hér fyrir neðan má sjá niðurstöður Selatalningarinnar miklu frá upphafi. Gulu súlur sýna þau ár sem Heggstaðanesið var ekki talið og talningarsvæðið því rúmlega 70 km.
Veik staða selastofna Íslands er áhyggjuefni og Selatalningin mikla gefur vísbendingu um að hún sé ekki að styrkjast, þó varast beri að draga of sterkar ályktanir af henni. Það er fagnaðarefni að vinna er hafin við nýtt stofnmat á landselnum og í sumar verða Faxaflói og strandlengja Norðvesturlands talin með drónum. Sú vinna mun varpa skýrara ljósi á stöðuna.
Sem fyrr þökkum við sérstaklega landeigendum sem gefa sjálfboðaliðum leyfi til að fara um land sitt til að telja. Við þökkum líka Ölgerðinni sem gaf sjálfboðaliðum orku- og gosdrykki þriðja árið í röð.
