Author: Örvar Birkir Eiríksson

Í nóvember hófst formlega Erasmus+ verkefnið styrkt af EU sem ber heitið Climate Challenge Adventure (2024-1-IS01-KA220-SCH-000243341) sem Selasetur Íslands leiðir. Markmið verkefnisins er að gera ungt fólk meðvitaðra um loftslagsbreytingar með nýstárlegri og leikjamiðaðri nálgun. Einnig að veita þeim nauðsynlega þekkingu og færni til að taka virkan þátt í baráttunni gegn þessu alþjóðlega vandamáli og hvetja til þátttöku þeirra í loftslagsaðgerðum.

Verkefnið miðar einnig að því að skapa vettvang sem sameinar menntun og skemmtun, nýtir krafta tækninnar, listar og gerir ungu fólki kleift að þróa umhverfisvitund sína og taka áþreifanleg skref í átt að sjálfbærri framtíð.

Ásamt Selasetrinu taka eftirfarandi aðilar þátt í verkefninu: Grunnskóli Húnaþings vestra, Schwerpunkt Zentrum frá Þýskalandi, Mariagerfjord Gymnasium frá Danmörku, Formación Academia Barcelona frá Spáni og Özel Balikesir Bilnet Ortaokulu frá Tyrklandi.

Upphafsfundur verkefnisins var haldinn á Íslandi í lok nóvember og stuttu fyrir jóla var fyrsti LTT (Learning, Teaching, Training) viðburður þesss í Danmörku. Næsti stóri viðburður er LTT2 í Tyrklandi í byrjun maí. Nánar má lesa um verkefnið á heimasíðu eða Facebook síðu þess, þar sem bætt verður við efni og fréttum eftir því sem verkefnið þróast áfram.

Hafrannsóknastofnun auglýsir eftir rannsóknamanni til starfa í sýna- og gagnavinnslu við selarannsóknir á starfsstöð stofnunarinnar á Hvammstanga. Starfið felst í fjölbreyttri vinnu við öflun og úrvinnslu gagna í landi og mögulega í rannsóknaleiðöngrum á sjó. Ætlunin er að ráða í starfið frá og með 1. mars 2025 og er umsóknarfrestur til 20. febrúar.

Nánari upplýsingar um starfið má finna hérna:

Starf rannsóknamanns á Hvammstanga | Ísland.is

Selasetur Íslands óskar öllum gleðilegra jóla og farsældar á komandi ári.

Selasetrið verður lokað yfir hátíðarnar frá og með 23. desember til og með 5. janúar.

Í rúmt ár hefur Selasetrið verið þátttakandi í Evrópuverkefninu CE4RT eða hringrásarhagkerfið og nærandi ferðaþjónusta (e. Circular Economy for Regenerative Tourism) ásamt 16 öðrum íslenskum fyrirtækjum sem og rúmlega 60 fyrirtækjum frá Finlandi, Póllandi, Hollandi og Írlandi.
Verkefnið samanstóð af fjölda netfyrirlestra auk fræðsluferðar um Suðurland og ráðstefnu á Írlandi sem var lokapunktur verkefnisins. Ráðstefnan var haldin á Skellig hótelinu á Dingle skaganum sem er vestarlega á Írlandi. Þar var grænt og fagurt um að litast þrátt fyrir að komið væri framyfir miðjan nóvember.

Stærsti ávinningur Selasetursins af CE4RT verkefninu var hins vegar að það styrkti þátttakendur í ráða sér ráðgjafa til að liðsinna við að ná sér í umhverfisvottun. Selasetrið var svo heppið að fá Hjört Smárason hjá Saltworks sem ráðgjafa en hann hefur unnið að stefnumótunarvinnu fyrir NV-land fyrir SSNV og þekkir því svæðið vel.

Eftir talsverða vinnu og ýmsar lagfærslur á Selasetrinu fékk það Green Key umhverfis- og sjálfbærnivottun í lok júlí sl. Green Key er vottun sem nýtur sífellt meiri vinsælda og eru núna yfir 6.000 fyrirtæki í yfir 70 löndum með Green Key vottun. Á Íslandi eru 21 fyrirtæki með þessa vottun en Selasetrið er fyrsta fyrirtækið í afþreyingarflokki (e. attraction) til að fá Green Key vottun á Íslandi.
Green Key vottunin er stór áfangi á þeirri vegferð Selasetursins að stuðla áfram að sjálfbærri og nærandi ferðaþjónustu í Húnaþingi vestra þar sem selurinn er að sjálfsögðu í aðalhlutverki.

Í byrjun ágúst sett Markaðsstofa Norðurlands upp þrjú listaverk á Norðurstrandarleið, sem hluti af því að efla enn frekar áhuga og kynningu á leiðinni. Listaverkin voru unnin af hópi listafólks frá Úkraínu sem kallar sig UNDRUN/Dyvyna DECOR. Verkefnið var unnið í samstarfi við Ferðamálasamtök Norðurlands vestra, með styrk frá Uppbyggingarsjóði Norðurlands vestra.

Partur af þessu verkefni var sæljón sem sett var upp á Hvammstanga og bjóðum við það velkomið. Vegna framkvæmda verður það á öruggum stað á stéttinni fyrir framan Selasetrið í vetur en endanleg staðsetning verður ákveðin með vorinu.
Það má því segja að þó að selurinn sé að sjálfsögðu alltaf í aðalhlutverk hjá okkur, þá fögnum við því að vera núna með bæði styttu af sæljóni og sýningu Náttúruminjasafnins Íslands um rostunga.