Illugastaðir

Skemmtilegur sela- og fuglaskoðunarstaður hefur nú verið byggður upp á Illugastöðum. Þar hefur verið útbúið bílastæði, lagður göngustígur og komið upp salernisaðstöðu fyrir ferðmenn.

Á Illugastöðum gefst ferðamönnum tækifæri á að skoða bæði seli og fugla í einstöku umhverfi. Selur er við Illugastaði allt árið, þó heldur fækki yfir kæpingartímann (maí – byrjun júní). Göngustígur liggur niður að höfða þar sem selurinn liggur á skerjum úti fyrir. Forvitnir selir synda oft mjög nálægt kyrrstæðum hljóðlátum ferðamönnum á þessum stað, og því oft óljóst hvort um selaskoðun eða mannaskoðun sé að ræða! Sumarið 2018 sáust oft um 50 seli á Illugastöðum..

Illugastaðir eru einnig frægt sögusvið Illugastaðamorðanna í Natans sögu Ketilssonar, og má enn sjá leifar af smiðju Natans þar.

Hægt er að panta leiðsögn um Illugastaði í gegnum Selasetur Íslands.

Illugastaðir eru lokaðir í nokkrar vikur á hverju sumri vegna æðarvarps.